د جنوبي کوریا د بهرنیو چارو وزارت وايي چي د افغانستان او پاکستان لپاره ځانګړی استازی به یې په افغانستان کي د جنوبي کوریا د بشري مرستو پروژې د نړیوالو سازمانونو په همکارۍ و ارزوي او څېړنه به یې وکړي.
دغه وزارت د افغانستان د بشري مرستو د دفترونو له استازو سره له یوې مجازي ناستي وروسته په دې اړه یو بیان خپور کړی.
په دې بیان کي یادونه سوې چي دا پروژې په افغانستان کي د نړیوالو سازمانونو له لاري عملي سوي دي.
د جنوبي کوریا د بهرنیو چارو وزارت ډاډ ورکړی چي هیواد به یې د افغانستان د بشري بحران د هواري لپاره خپلي مرستي ته دوام ورکړي.
دا مرستي په ځانګړي توګه د خوړو د کمښت د حلولو، د طبیعي پېښو د ځواب ویلو، د زیان منو ډلو لکه ښځو او کوچنیانو ملاتړ کولو، کډوالو او کورنیو بې ځایه سویو ته په مرسته رسولو باندي متمرکزي دي.