د افغانستان د سولي لپاره د امریکا د متحدهایالاتو پخوانی استازی زلمی خلیلزاد وایي، د دوحې د تړون پټي برخي د افغانستان د راتلونکي حکومت په اړه نه دي.
خلیلزاد په یوه پاډکسټ کي چي پرون “دوحه ډیبیټز” خپور کړ، وویل د دوحې د تړون محرمي برخي د ترهګرۍ او له افغانستانه د بهرنیو ځواکونو د وتلو په ارتباط دي.
د امریکا متحدهایالاتو د۲۰۲۰م کال د فبروري په ۲۹مه له طالبانو سره د قطر په پلازمېنه دوحه کي د سولي تړون لاسلیک کړ.
د دې تړون یو شمېر مادې له رسنیو سره شریکي شوي او یو شمېر یې نه دي شریکي سوي.
په پروني پاډکسټ کي خلیلزاد زیاته کړه چي د دوحې تر تړون مخکي د سولي د خبرو پر مهال واشنګټن هغه وخت دا نظر درلود چي د ځواکونو ایستل باید د طالبانو او افغان حکومت تر منځ له موافقې سره مشروط نه سي، ځکه چي افغانان په خپلو کي توافق ته نه رسېږي.