د مي ۲۹ د پښتو ملي ورځ ده

نن، پنج‌شنبه د ۲۰۲۵ کال د مي میاشتي ۲۹مه نېټه، د پښتو ژبي ملي ورځ ده.
دا ورځ هر کال په افغانستان او د نړۍ په ګوټ ګوټ کښي د پښتنو په منځ کښي د پښتو ژبي د اهمیت او ویاړ په پار لمانځل کېږي. پښتو، چي د پښتنو د تاریخي او کلتوري هویت یوه مهمه برخه ده، د میلیونونو خلګو زړونو او ذهنونو ته یو ځانګړی مقام لري.
د پښتو ژبي ملي ورځ د پښتنو د ژبي، ادب او کلتور د ساتني او ودې له پاره یوه مهمه موقع ده. په دې ورځ، پښتانه په بېلابېلو هیوادونو کښي غونډي، ادبي پروګرامونه، او کلتوري غونډي جوړوي ترڅو د خپلي ژبي ارزښت او غني ادبي میراث ولمانځي. دا ورځ نه یوازي د پښتو ژبي د تاریخي اهمیت یادونه کوي، بلکي د راتلونکو نسلونو له پاره د دې ژبي د ساتني او پرمختګ له پاره هم یو ږغ پورته کوي.
خو له بده مرغه، تر اوسه په افغانستان کښي هېڅ یوه حکومت دې ورځي ته رسمي بڼه نه ده ورکړې. که څه هم پښتو د افغانستان یوه رسمي ژبه ده او د هيواد په اساسي قانون کښي ئې مقام خوندي دی، خو د ملي ورځي په توګه د دې ورځي رسمي لمانځنه لا هم یوه هيله ده. پښتانه او د پښتو ژبې مینه‌وال له حکومته غوښتنه کوي، چي دا ورځ په رسمي توګه ولمانځل سي ترڅو د پښتو ژبي او کلتور په وړاندي د ملي یووالي او ملاتړ روحیه نوره هم پیاوړي سي.
د پښتو ژبي ملي ورځ د پښتنو د یووالي او هویت یوه نښه ده. دا ورځ پښتنو ته دا پیغام راکوي چي خپله ژبه او کلتور وساتو او د نړۍ په کچه ئې ولمانځي راځئ چي په دې ورځ د پښتو ژبي د لا پرمختګ او ودي له پاره خپلي هڅي یو موټي کړو او د خپلي ژبي د بډایني له پاره کار وکړو.
پښتو ژبه ژوندۍ ده او د دې ژبي ویاړ د هر پښتون په زړه کښي ژوندی دئ.