د هېواد په دریو ولایتونو کي ترافیکي پېښو ۲۲ تنو ته مرګ ژوبله اړولې ده

د افغانستان په غزني، لغمان او هرات ولایتونو کي د ترافیکي پېښو له امله ۲۲ تنو ته مرګ ژوبله اوښتې ده.
په یاده شمېره کي شپږ کسان مړه سوي او ۱۶ نور ټپیان سوي دي.
د غزني مسوولین وایي، چي په اندړو ولسوالۍ کي د یو «فیلډر» موټر چپه کېدو پېښه کي دوه کسان مړه سوي دي.
دغه راز د دغه ولایت مقر ولسوالۍ پوري اړوند سیمه کي بیا یو مسافر وړونکي ۵۸۰ ډوله موټر له بار وړونکي موټر سره ټکر کړی، چي له امله یې یو کس مړ او پنځه تنه ټپیان دي.
بل لورته د لغمان مرکز مهترلام ښار کي یو موټرسایکل له پلچک سره جنګېدلی، چي په پایله کې یې دوو کسانو ژوند له لاسه ورکړی.
دغه راز په هرات کي ځايي سرچینو ویلي، چي د دغه ولایت په انجیل ولسوالۍ کي یو بار وړونکي موټر ۱۲ کلن هلک لاندې کړی دی.
د دې ترڅنګ، د هرات په ادرسکن ولسوالۍ کي د درېیو جلا ترافیکي پېښو له کبله ۱۱ کسان ټپیان سوي، چي د ځینو ټپیانو روغتیايي وضعیت نازک ښودل سوی دی.