د کندهار د اقتصادي ریاست مسوولین وایي، د ملګرو ملتونو د ماشومانو د ملاتړ صندوق (UNICEF) په مالي ملاتړ د کندهار په ۱۱ ولسوالیو کې د ۲۰ ښوونځیو لپاره ودانۍ جوړیږي.
د اقتصاد ریاست ویاند کمال شاه سادات وايي، د دغه ښوونځیو د جوړېدو چارې پرون یک شنبه له سپین بودلک څخه راپېل سوې.
د سادات په خبره، دغه هر ښوونځی به د ۲۴۰ تنو زده کوونکو ظرفیت ولري او هغه کوچنیان چي پخوا تر شنه اسمان لاندي یا په خېمو کي یې زده کړي کولې وروسته به منظمي او د سولر سیسټم په لرلو سره معیاري ودانۍ ولري.
د سیمي اوسېدونکي هم خوښ دي چي د کوچنیانو لپاره یې د ښوونځیو ودانۍ جوړیږي او وایي، دوی به په منظم ډول خپل کوچنیان زده کړو ته واستوي.