د هرات په اسلام قلعه بندر کي سرحدي چارواکي وایي، له ایرانه اکثره ایستل کېدونکي افغان کډوال فزیکي او رواني شکنجه سوي دي.
په دغه بندر کي د بېرته ستنېدونکو د نوملیکني مسوول عبدالغني قاضيزاده فرانس پرېس اژانس ته ویلي، هره ورځ شاوخوا درې زره افغانان له ایرانه ایستل کېږي.
دغه اژانس نن چهارشنبه په یوه راپور کي د قاضيزاده په حواله دغه راز ویلي چي ۹۰ سلنه دغه افغانان په زور او پاته لس فیصده یې په خپله خوښه ستنېږي.
د کډوالو د فزیکي شکنجې د څرنګوالي ډېر معلومات نه دي خپاره سوي.
له ستنېدنکو افغانانو سره چي د ښه ژوند هیلي يې مړې سوي، په سرحد کي د کډوالۍ نړیوال سازمان د نفر سره دوه زره افغانۍ مرسته کوي.
دغه مرسته یوازي کورنۍ لرونکو کډوالو ته ورکول کېږي او هغه کس چي یوازي وي، له دې کمو پيسو بې برخي کېږي.