امریکا ته د تګ په تمه افغانان په پاکستان، قطر او البانیا کي له ورک برخلیک سره مخ دي

اسوشیتډپرېس خبري اژانس په یوه راپور کي ویلي، د امریکا د ولسمشر ډونالډ ټرمپ فرمان، چي د پناه غوښتونکو د منلو بهیر یې ځنډولی، پکښي امریکا ته په تمه افغانان هم شامل دي.
سرچینه زیاتوي، چي دغه افغانان چي په پاکستان، البانیا او قطر کي میشت دي اوس له ناڅرګند برخلیک سره مخ دي.
بل خوا رویټرز خبري اژانس په یوه راپور کي ویلي، چي د افغان کډوالو د ایستلو د پروګرام مشر، شان وېنډیوار د امریکا د بهرنیو چارو وزارت له یو لیک استولی.
په دې لیک کي د امریکا د بهرنیو چارو له وزیر څخه غوښتنه سوې، چي د افغان متحدینو ملاتړ ته دوام ورکړي، که نه په خبره یې د هغوی ژوند به لا زیات له ګواښ سره مخ سي.
سرچینې د لیک د محتوا پر اساس زیاته کړې، چي دا به په راتلونکو جګړو کي د امریکايي ځواکونو باور ته زیان ورسوي.
د امریکا د پخوانیو نظامیانو یو ډلي هم له بهرنیو چارو وزارت څخه ورته غوښتنه کړې ده.