د امر بالمعروف او نهی عن المنکر وزارت خبر ورکړی چي د موسیقۍ یوشمېر الې او د ښځو ۹۰۰ کیلوګرامه ورېښتان یې سوځولي دي.
د یاد وزارت په یوه بیان کي ویل سوي چي د کابل په ده سبز ولسوالۍ کي د شکایتونو د اورېدو د ریاست کارکوونکو دا د موسیقي الې او ورېښتان ترلاسه کړي وه.
وزارت زیاته کړې چي دا توکي یې په وروستیو ورځو کي سوځولي دي.
دا لومړی ځل دی چي چارواکي د ښځو د ورېښتانو د سوځولو خبر ورکوي، خو د ۲۰۲۱ کال د اګست میاشتي راهیسي چي طـ.البان بیا پر افغانستان واکمن سوي، څو ځله یې د موسیقۍ الې سوځولي او له منځه وړي دي.
طـ.البانو په ټولو ولایتونو کي د ښځو د ورېښتانو پر رانیولو او خرڅولو سخت بندیز لګولی او هغه کسان نیسي چي د ښځو ورېښتان رانیسي.