تر یو میلیون ډېر افغان کوچنیان په درنو کارونو بوخت دي

په ملګرو ملتونو کي د افغانستان د دایمي استازولۍ سرپرست نصیر احمد فایق له یو میلیون زیاتو افغان کارګرو کوچنیانو د وضعیت په اړه اندېښنه څرګنده کړې ده.
هغه وايي، دا مهال تر یو میلیون ډېر افغان کوچنیان د بېوزلۍ او اقتصادي ستونزو له امله په سختو او خطرناکو کارونو بوخت دي.
نصیراحمد فایق د ملګرو ملتونو په مقر کي د ټولنیز پرمختګ د کمیسیون په ۶۳مه غونډه کي وویل چي افغانستان لا هم له یوه پراخېدونکي بشري ناورین سره مخامخ دی.
په افغانستان کي یو شمېر کارګر کوچنیان هم له خپل ژونده شکایت لري او وایي، د بېوزلۍ او اقتصادي ستونزو له امله ښوونځي ته نه سي تللای او اړ دي چي کار وکړي.
یو شمیر کورنۍ هم له بد اقتصادي وضعیت څخه شکایت کوي او وایي، نه سي کولای د خپلو کوچنیانو اړتیاوي پوره کړي.
مخکي هم د یو شمیر نړیوالو سازمانونو له خوا د افغان کوچنیانو د وضعیت په اړه اندیښنې مطرح سوي وې.