د اطلاعاتو او کلتور وزارت د هنر او کلتور معین عتیق الله عزیزي، د ترکیې «ټیکا» مؤسسې له مسوول فاضل آکین اردوغان سره کتلي دي.
چارواکي وایي، په دې کتنه کي د «ټیکا» مؤسسې مسوول د دغه مؤسسې د فعالیتونو په اړه معلومات ورکړي او ویلي یې دي چي د ترکیې او افغانستان د خلکو د ګډو فرهنګي مشترکاتو او اوږدې ملګرتیا له مخي به، د افغانستان د تاریخي آبداتو په رغونه او د ملي آرشیف، هنرستان او عامه کتابتونونو د تجهیز په برخه کي، خپله همکاري پراخه کړي.
هغه ژمنه کړې چي د خپلو پرمختیایي او فرهنګي پروګرامونو له مخي به ډېر ژر، د مولانا جلال الدین محمد بلخي د والد مدرسې او خانقا له سروې وروسته د بیارغوني لپاره لاس په کار سي.
د هنر او کلتور معین هم په خپلو خبرو کي، د یادي مؤسسې اغېزمن فعالیتونه ستایلي او ویلي یې دي چي ترکیې تل له افغانستان سره په پرمختیایي او فرهنګي کارونو کي مرسته کړې ده.