د امریکا د سفارت د عامه اړیکو مشر ماریو کریفو له ښځو سره د تاوتریخوالي د مخنیوي د شپاړس ورځني کمپاین په مناسبت په یوه ویډیويي پیغام کي چي پرون د سفارت پر ایکسپاڼه خپور سو ویلي چي افغان ښځي او نجوني د نړۍ د نورو ښځو په څېر خوندیتوب، امنیت، فرصتونه او د خپل هېواد د راتلونکې په جوړولو کي ونډه غواړي.
کریفو وايي چي ده او د امریکا په سفارت کي د ده نورو همکارانو د افغان ښځو او نجونو د دې هیلو د ترسره کولو لپاره د یوه پروګرام پر جوړولو او عملي کولو کار پیل کړی دی.
نوموړي د دې پروګرام جزییات نه دي بیان کړي.
متحدهایالات د پرځېدلي جمهوري نظام په شل کلنه واکمنۍ کي د هغو پروژو لوی تمویلوونکی هیواد وو چي د ښځو د پیاوړي کېدو لپاره یې کار کاوه، خو د ۲۰۲۱م کال په اګست میاشت کي پر افغانستان د طالبانو له بېا واکمنېدو وروسته دا ټول پروګرامونه وځنډېدل.
