د افغانستان کرکټ ملي لوبډلي د کرکټ نړيوالي شورا (ICC) له خوا د ۵۰ اوريزه لوبو په درجه بندۍ کي د لومړي ځل له پاره اتم مقام خپل کړ.
افغانستان د وروستيو ښو لوبو په ځانګړي ډول له سوېلي افريقا څخه د ۵۰ اوریزي لوبلړۍ دوه پر يو ګټل او تېره چهارشنبه له بنګله دېش څخه د یوې ۵۰ اوریزي لوبي د ګټلو له امله د کرکټ نړيوالي شورا په تازه اعلان سوې درجه بندۍ کي پرمختګ کړی او له نهم مقام څخه اتم مقام ته پورته سوی دی.
که افغانستان له بنګله دېش څخه وروستۍ دوې او په راتلونکي سپټمبر مياشت کي له زمبابوې څخه درې لوبي هم وګټي، نو په دغه درجه بندۍ کي به نور پرمختګ وکړي.