د امنیت شورا غړیو په افغانستان کي د داعش د فعالیتونو پر زیاتېدو اندېښنه ښوولې

د ملګرو ملتونو د امنیت شورا غړو په افغانستان کي د ترهګرو ډلو، په ځانګړي ډول د داعش د خراسان څانګي، القـ.اعده، او د ختیځ ترکستان د اسلامي حرکت د فعالیتونو په اړه اندېښنه څرګنده کړې ده.
د ترهګرۍ پر ضد د ملګروملتو د سرمنشي مرستیال ولادیمیر ورونکووف امنیت شورا ته وویل، چي داعش خراسان لا هم په افغانستان، سیمه او له هغه ورهاخوا یو جدي ګواښ ګڼل کېږي.
نوموړي د امنیت شورا له غړو وغوښتل چي پر ترهګریزو فعالیتونو په مرکز د افغانستان د بدلېدو مخه ونیسي.
په امنیت شورا کي د امریکا د متحدو ایالتونو ځانګړي استازي هم د داعش خراسان د پراخېدونکو وړتیاوو په اړه اندېښنه څرګنده کړه.
د امریکا استازي دوروتي شی وویل، واشنګټن د دې ډلي د جلب و جذب او بریدونو د وړتیا، په ځانګړي ډول په افغانستان او پاکستان کي، جدي اندېښمن دی.