د سمنګان-بغلان پر لویه لاره په یوه ترافیکي پېښه کي د يو تن د مړيني او شپږ نورو د ټپي کېدو خبر ورکړل سوی دی.
د سمنګان د امنیې قوماندانۍ ویاند حشمت الله رحماني رسنیو ته ویلي، د دوشنبې ماسپښین د سمنګان په رباطک سیمه کي یو فورتینر ډوله موټر چپه سو چي پکښي يوه کوچني ساه ورکړې او د ښځو او ماشومانو په شمول شپږ کسان نور په کي ټپيان سوي دي.
نوموړي زیاته کړه چي ټپیان د سمنګان ولایتي روغتون ته لېږدول سوي دي.
د سړکونو خرابوالی، د ترافیکي اصولو نه رعایت او د چلوونکو بې احتیاطي په افغانستان کي د زیاتو ترافیکي پېښو لوی لاملونه ګڼل کيږي.