د خوړو نړیوال پروګرام پر خپله اېکس پاڼه لیکلي چي په افغانستان کي ښځي د ژوند د تیرولو لپاره ډیري کمي پیسې سپموي او ترټولو دروند پېټی پر خپلو اوږو باندي وړي.
د خوړو د نړیوال پرګرام د معلوماتو پراساس په افغانستان کي له وړاندي څلور میلیونه ښځي او کوچنیان د خوارځواکۍ سره لاس او ګرېوان دي او د اضافي بودیجې د نه چمتو کولو په صورت کي به وضعیت لا خراب سي.
د خوړو د نړیوال پروګرام سربېره د ملګرو ملتونو د کډوالو عالي کمېشنرۍ هم د جولای د میاشتي په وروستیو کي، په یو راپور کي په افغانستان کي د خپلو پرګرامونو د دوام لپاره د بودیجې د کمښت خبر ورکړی وو.
د بشري مرستو ځینو ادارو هم خبرداری ورکړی چي افغانستان د نړیوالي ټولني د مشارکت او ملاتړ پرته له یاد څخه د یو هېر سوي بحران باندي د بدلېدو د حالت سره مخ دی.