د افغانستان لپاره د پاکستان ځانګړی استازی وايي په کابل کي یې د بهرنیو چارو له وزیر سره کتلي او په سیمه کي یې د دوه اړخیزو همکاریو او امن پر لا پیاوړتیا موافقه کړې ده.
محمد صادق د سې شنبې په ورځ په ایکس کي لیکلي چي هغه د امیر خان متقي سره “پراخ بحثونه” کړي دي.
محمد صادق په دې وروستیو کي د افغانستان لپاره د پاکستان د دوهم ځانګړي استازي په توګه وټاکل سو.
دا له ټاکل کېدو وروسته کابل ته د ده لومړی سفر دی.
محمد صادق کابل ته له رسېدو وروسته د کورنیو چارو له وزیر سره هم وکتل.
هغه وویل چي د افغانستان او پاکستان ترمنځ د ستونزو د هواري لپاره د ګډو هڅو ته هوډمن دی.
د پاکستاني طالبانو او په پښتونخوا کي د پراخي ناامنۍ له امله د پاکستان او طالبانو ترمنځ اړيکي خرابي سوي دي.
