د ملګرو ملتونو په امنیت شورا کي د چین استازي فوکونګ ویلي، افغانستان کي امنیتي او اقتصادي وضعیت ښه سوی او سیمه ییزي همکارۍ هم پراخي سوي دي.
خو نوموړي په خپلو خبرو کي زیاته کړې، چي بشري، پراختیایي، ترهګریز ګواښونه او د ښځو حقونو مسایل ناحل پاته دي.
که څه هم فوکونګ په خپله وینا کي د ټولو افغانانو د حقونو د خوندیتوب لپاره پر هڅو ټینګار وکړ، خو زیاته یې کړه، چي په افغانستان کي د اوسني وضعیت یوازینی لامل د ښځو د حقونو موضوع نه ده.
نوموړي په دغه برخه کي د نړۍوالي ټولني رول مهم وباله او ویلي يې دي چي نړۍواله ټولنه باید د افغانستان پرمختګ لپاره په مالي، تخنیکي او وړتیا لوړولو په برخو کي له دغه هیواده ملاتړ زیات کړي.
دا په داسي حال کي ده چي د امنیت شورا د څو غړیو په شمول څوارلس هیوادونو، په یوه ګډه اعلامیه کي ویلي، چي تر هغه وخته به سرپرست حکومت په رسمیت ونه پېژني، ترڅو چي ښځو ته پوره حقونه ورکوي.
