د ډله ییز امنیتي تړون وايي، د افغانستان وضعیت له نژدې څخه څاري

د ډله ییز امنیتي تړون سازمان ویلي، د افغانستان وضعیت له نږدې څاري او له دې هیواده د ترهګرۍ او مخدره موادو د قاچاق د ګواښونو پر وړاندي مبارزه کوي.
د ډله ییز امنیت د تړون سازمان عمومي منشي امانقلي تاسماګامبتوف وايي، د منځنۍ اسیا هیوادونه لا هم له افغانستانه د ترهګرۍ، تُندلارۍ او مخدره موادو د قاچاق له پلوه له ګواښ سره مخ دي.
د دغه سازمان په اعلامیه کي د تاسماګامبتوف په حواله راغلي دا ګواښونه په افغانستان کي له یو لړ مثبتو پرمختګونو سره سره دوام لري.
د ډله ییز امنیت د تړون سازمان د پارلماني کمېټو مشرانو د روسیې په پارلمان کي غونډه کړې او د سیمي او افغانستان په اړوندو مساییلو یې بحث کړی دی.
د یادي غونډي د پای په اعلامیه کي ټینګار سوی چي له افغانستانه د منځنۍ اسیا هیوادونو ته د ترهګرۍ او مخدره موادو د ګواښونو د مخنیوي لپاره د ډله ییز امنیت د تړون سازمان غړي هیوادونه ګډي هڅي کوي.
بل خوا د طـ.البانو ویاند ذبیح الله مجاهد په یوه پيغام کي ویلي، د ډله ییز امنیت د تړون سازمان چي د افغانستان یا د پولو په تړاو کومه اندېښنه مطرح کوي پر ځای نه ده، ځکه افغانستان ټولیز امنیت لري او د هیڅ هیواد پر ضد د افغستان له خاوري ګټه وانه خیستل سي.