د کابل په پغمان کي سل کاله وړاندي د مېلمنو لپاره جوړي سوي یوې ودانۍ ته اور اچول سوی

د کابل ښار پغمان په سیمه کي سل کاله وړاندي د مېلمنو لپاره له جوړو سویو قصرونو څخه یوه ته اور اچول سوی دی.
تاریخ لیکونکي سردارولي پښتون زوی لیکلي چي دا د افغان تاریخ لپاره بد زیری دی چي دا ډول یوه تاریخي ودانۍ سوځول کیږي.
هغه وايي، کله چي شاه امان الله خان غازي په پغمان کي لويه جرګه جوړه کړه، نو د زرګونو مېلمنولپاره کوم مناسب دولتي ځای نه وو، له جرګې وروسته هغه په پغمان کي د دغسي غونډو او میلمنو لپاره د غره په څنډه کي د جشن او جرګو لپاره څو ماڼۍ په شخصي مصرف جوړي کړې.
له دغه ماڼيو څخه مشهوري یې حرم سرای ماڼۍ، کوټۍ سفید، کوټۍ سرخ، کوټۍ اعلیحضرت، روغتون، مشتري ښوونځی، کارخانه، لوی جوماعت، موټرخانه، پیاده خانه او نور چي د ملت د کور په توګه علما، مشایخ، وکیلان او د لویې جرګې ګډونوال به ورته دعوت کېدل.
تر اوسه معلومه نه ده چي دغه ودانۍ ته چا اور اچولی دی.