متقاعدینو یو وار بیا د خپلو حقونو لپاره اعتراض کړی دی

متقاعدینو یو وار بیا په کابل ښار کي اعتراضي غونډه کړې ده او وایي، تر اوسه یې لا هم ستونزي نه دي حل سوي.
د دې غونډي ګډونوالو له حکومته وغوښتل چي د دوی د تقاعد حقونه ورکړي ځکه اکثره یې دومره څه نه لري چي ګزاره یې په وسي.
په تېرو کلونو کي متقاعدینو په کراتو د کابل ښار په واټونو او د مالیې وزارت مخته لاریونونه کړي خو لا یې څه نتیجه نه ده ورکړې.
د ا.ا مشرتابه په یوه فرمان سره د متقاعدینو حقوق لغوه کړي او امر یې کړی چي د حکومتي کارکوونکو له معاشونو دي د تقاعد پيسې جلا نه سي.
د افغانستان د متقاعدینو د ټولني په وینا دغه هیواد څه باندي ۱۷۰ زره ملکي او پوځي متقاعدین لري.
متقاعدینو داسي وخت د خپلو معاشونو او حقونو غوښتنه کړې چي د راپورونو له مخي حکومت له شاوخوا دوو میاشتو د دولتي کارکوونکو معاشونه نه دي ورکړي.