متقي وایي، هیڅوک باید له نظامه ونه تښتي او باید هیڅوک خفه نه سي

د بهرنیو چارو وزیر امیرخان متقي په غیرمستقیم ډول د حکومت د مشرتابه له لوري د واک پر تمرکز انتقاد کړی.
امیرخان متقي پرون شنبه په یوه دیني مدرسه کي د وینا په ترڅ کي د داخلي همږغۍ پر اړتیا ټینګار وکړ او د داسي پالیسیو پر وړاندي یې خبرداری ورکړی چي د ده په وینا له هیواده د خلکو د تیښتي سبب کېږي.
ښاغلي متقي وړاندیز کړی چي مشرتابه باید ټول سره راټول کړي او د خپلو کسانو د پردي کېدو مخه ونیسي.
د متقي دا څرګندوني په داسي حال کي کړي چي د طـ.البانو ترمنځ داخلي اختلافات مخ پر زیاتېدو دي.
د طـ.البانو د سیاسي چارو مرستیال شیر محمد عباس ستانکزی تر دې وړاندي د هبت‌الله اخندزاده پر پالیسیو، په تېره بیا د نجونو د زده کړو پر مخنیوي د انتقاد له کبله له هیواده وتلو ته اړ سوی دی.