د ملګرو ملتونو د خوړو نړیوال پروګرام (WFP) په یو راپور کي ویلي چي په افغانستان کي د بشري مرستو د دوام لپاره د بودیجې د سخت کمي له امله دغه پروګرام د ۱۲ میلیون اړمنو افغانانو له ډلي یوازي یو میلیون کسانو ته مرسته برابرولای سي.
د خوړو نړیوال پروګرام د ایکس په ټولنیزه شبکه کي په یو راپور کي ویلي چي د دغو ۱۱ میلیون کسانو سربیره له دې وروسته په افغانستان کي ۱.۴ میلیون میندي او کوچنیان د دغه پروګرام له خوا د خوارځواکۍ د مخنیوي لپاره ځانګړي خوراکي توکي هم نه سي ترلاسه کولای.
د ملګرو ملتونو د خوړو نړیوال پروګرام په افغانستان کي د اقلیم د بدلون اغیزو له امله د روان ۲۰۲۴ کال د اپریل او مې د میاشتو اورښت وروسته د سیلابونو او د تیر ۲۰۲۳ کال د اکتوبر په میاشت کي د هرات په ولایت کي د زلزلو له امله مصیبت ځپلو او هم له پاکستان څخه ستنیدونکو افغان کډوالو د ستنیدلو د بهیر یادونه کړې ده.
دغه پروګرام وایي، چي زیات شمیر کډوال تش لاس داسي هیواد ته چي په اړه یې ډیر کم پوهیږي او خپلو کوچنیانو ته د خوړو د برابرولو لپاره ډیر کم فرصتونه لري، ستانه سوي دي.
ډبلیو ایف پي ویلي چي د روان کال په اوږدو کي یې نږدې څلورو میلیونه اړمنو افغانانو ته چي نږدې نیمايي یې ښځي دي نغدي مرستي برابرې کړي دي.