ملګري ملتونه وايي، لا هم په افغانستان کي د ځنګلونو تخریب دوام لري

د ملګرو ملتونو د خوړو او کرني اداره وايي، چي په افغانستان کي د ځنګلونو تخریب لا هم یوه جدي ننګونه ده او د ځنګلونو تخریب دوام لري.
دې ادارې ویلي چي له ۲۰۱۹ کال راهیسي یې د نړیوال چاپېریال د اسانتیاوو له سازمان سره په ګډه په کونړ کي ۴۷۱ زره د څېړیو او چهارمغز نیالګي او ۸۰ زره مېوه لرونکي وني ایښي دي.
د ملګرو ملتونو د خوړو او کرني ادارې پر خپله ایکسپاڼه لیکلي چي د دې ونو له اېښودلو سره په کونړ ولایت کي ۳۳۰۰ هکتاره ځنګلونه بیا رغول سوي دي.
د ملګرو ملتونو د ارزوني له مخي، ځنګلونه او بوټي لرونکي سیمي د افغانستان شاوخوا ۱.۷۸ میلیون هکتاره مساحت پوښي چي د افغانستان د ټولي مځکي شاوخوا ۲.۸ سلنه جوړوي.
د ملګرو ملتونو په وینا، له ۱۹۹۰ څخه تر ۲۰۰۰ پوري د ځنګلونو او بوټو پوښښ په خورا زیات ډول کم سوی او په افغانستان کي د ځنګلونو د تخریب منځنۍ کلنۍ کچه ۲.۳ سلني ته رسېدلې ده.