په افغانستان کي نوی تعلیمي کال په داسي حال کي پيل سو چي لا هم نجوني تر شپږم ټولګي پورته او په پوهنتونونو کي زده کړي نه سي کولای.
د امریکا د بهرنیو چارو وزارت وايي، له زده کړو څخه لا هم د افغان نجونو محرومیت زړه ماتوونکی دی او دا حالت د اندېښنې وړ دی.
د امریکا د بهرنیو چارو وزارت د ویاند مرستیال ودانت پټېل په یوه خبري غونډه کي ویلي، که د افغانستان سرپرست حکومت نړیوال مشروعیت غواړي، د ښځو د حقونو خوندي کول یې مهم شرط دی.
هغه زیاته کړې، دا دریم کال دی چي افغان نجوني او ښځي له زده کړو بې برخي دي او دا موضوع د افغانستان په اړه د واشنګټن د سیاستونو لومړیتوب دی.
د افغانستان سرپرست حکومت د چهارشنبې په ورځ په کابل کي د نوي تعلیمي کال د پیل په غونډه کي د نجونو د زده کړو په اړه څه نه دي ویلي او په دې غونډه کي ښځینه خبریالانو ته هم د ګډون اجازه نه وه ورکړل سوې.