د چارواکو له خوا په نادولتي موسسو کي د افغان مېرمنو پر کار بندیز نن دوه کلن سو.
له نن څخه دوه کاله وړاندي د اقتصاد وزارت د یوه لیک په خپرولو سره په نادولتي ادارو او موسسو کي د ښځو او نجونو پر کار کولو بندیز ولګاوه.
يو شمېر ښځي چي د بنديز له امله يې دندي له لاسه ورکړي، وايي چي په تېرو دوو کلونو کي له ګڼو اقتصادي ننګونو سره مخ دي او د خپلو کورنيو د ملاتړ لپاره هیڅ لاره نه لري.
یو شمېر مېرمني وايي، چي د لوړو زده کړو له لرلو سربېره بیا هم د دې لپاره چي ښځي دي بايد بېوزلي او اقتصادي ستونزي وزغمي. د ښځو پر کار بندیز تل له ګڼو غبرګونونو سره مخ سوی دی. د امریکا د بهرنیو چارو وزیر انتوني بلینکن د ښځو او نجونو پر کار او زده کړو د بندیز د دوه کلن کېدو په مناسبت د دغه بندیز پر دوام اندېښنه څرګنده کړې او له طالبانو یې غوښتي چي ژر تر ژره د ښځو د حقونو د محدودولو ټول فرمانونه لغوه کړي
