د لغمان ولایت امنیه قومنداني وايي، د یاد ولایت په مرکز مهترلام ښار کي د یوې ترافیکي پېښي له امله پنځه کسان مړه او ۱۷ تنه نور ژوبل سوي دي.
یادي قومندانۍ په یوه خبرپاڼه کي ویلي چي، دا ترافیکي پېښه نن سهار په قلعه کوټ سیمه کي د دوو رکشو او یوه مرسیډیز موټر د ټکر په نتیجه کي رامنځ ته سوې او لامل یې د موټر چلوونکو بې احتیاطي یاده کړې ده.
دغه راز د بغلان ولایت د امنیې قومندانۍ مسولینو ویلي چي، د یاد ولایت په خنجان ولسوالۍ کي د یوې ترافیکي پېښي له امله یو کس مړ او شپږ کسان نور ژوبل سوي دي.
بل خوا د فاریاب ولایت د امنیې قومندانۍ مسوولینو ویلي چي، په یاد ولایت کي د یوې ترافیکي پېښي له امله یوه نجلۍ مړه سوې او د دوو ښځو په ګډون ۱۰ تنه نور ژوبل سوي دي.
په دې وروستیو کي یو ځل بیا په هیواد کي ترافیکي پيښي زیاتي سوي چي لوی لاملونه یې بې احتیاطي او خراب سړکونه بلل کیږي.
