په سوریه کي د هیئت تحریرالشام ډله د نوي حکومت په جوړولو بوخته ده خو اسرایلي پوځیان دمشق ته نږدې سوي او د سوريې پر پوځي مرکزونو يې هوايي بریدونو ته زور ورکړی.

هغه وسله‌‌وال چي د بشارالاسد رژیم یې د یک‌شنبې په ورځ وپرځاوه وایي چي، د یو موقت حکومت په جوړولو بوخت دي او د راپورونو له‌‌مخي محمد بشیر چي د هیئت تحریرالشام غړی دی، د دې موقت حکومت صدراعظم دی.
د بشارالاسد له‌‌خوا ټاکل سوي صدراعظم محمد غازي جلالي ویلي چي، د واک د انتقال په پروسه کي به مرسته وکړي.
د راپورونو له‌مخي، اوس د بشارالاسد مخالفان د دمشق ښار او دولتي ودانیو بشپړ کنټرول په لاس کي لري.
بل خوا په سوریه کي د بشري حقونو څار یو سازمان، چي مرکز یې بریتانیا کي دی وايي، اسرائیلي جنګي الوتکو په سوریه کي له ۱۰۰ ډېر هوايي بریدونه کړي دي او دغه ځواکونه دمشق ته نږدې سوي دي.
د بشري حقونو څار دغه سازمان وايي، په دې بریدونو کي د دمشق، درعاه، لتاکیا او حماه سیمو یو شمېر پوځي هدفونه په نښه سوي دي.