په میدان او بامیان ولایتونو کي د دوو جلا، جلا ترافیکي پېښو له امله یو کس وژل سوی او نهه تنه نور ژوبل سوي دي.
د میدان وردګ ولایت د امنیې قومندانۍ مسؤلینو ویلي چي، نن (دوشنبه) سهار په جلرېز ولسوالۍ کي د یوې ترافیکي پېښي له امله د دوو ښځو په ګډون اته کسان ژوبل سوي دي.
د یادي قومندانۍ ویاند یوسف اسرار وايي، پېښه په اسماعیل خېل سیمه کي د کابل- بامیان پر لویه لاره د یوه ټونس او یوې مازدا د ټکر په نتیجه کي رامنځ ته سوې او د رامنځ ته کېدو لامل يې بې احتیاطي یاده کړې ده.
د یوه بل خبر پر اساس، د بامیان ولایت په لومړي نمبر یکاولنګ ولسوالۍ کي هم د یوه موټر د چپه کېدو په پېښه کي یو کس وژل سوی او یو بل ژوبل سوی دی.
دا پېښي داسي مهال سوي چي، پرون د هلمند ولایت په باباجي ولسوالۍ کي هم بغرا سیند ته د یوه موټر په پېښه کي شپږ کسانو ژوند بایللی وو.
