د نورستان ولایت چارواکي وايي، په دواب ولسوالۍ کي د یو سپرلۍ وړونکي موټر د چپه کېدو له امله ۷ کسان مړه سوي او ۸ نور ټپيان دي.
مسوولین وايي، دغه ډاټسن موټر یوې کندي ته لوېدلی او په مړو او ټپيانو کي ښځي او کوچنیان هم شامل دي.
د نورستان ولايت د امنيه قوماندانۍ وياند غلام رحمان حیدري وايي، پرون مازیګر د دواب ولسوالۍ په بجګل سیمه کي یو موټر چي سپرلۍ پکښي وه، چپه سوی دی.
هغه زياته کړه، په دغه پېښه کي د ښځو او کوچنیانو په ګډون ۷ کسان مړه سوي او ۸ نور ټپيان دي.
هغه زياته کړه، امنیتي مسوولین د پېښي ځای ته رسیدلي مړي او ټپیان یې روغتون ته رسولي دي.
بل خوا د نورستان د والي وياند فریدون صمیم هم پېښه تايیدوي او وايي، سیمه غرنۍ ده، لاري خرابي دي لږ تیروتنه هم دا ډول پېښي رامنځته کولای سي.