په نورستان کي د یوه موټر چپه کیدو په پېښه کي ۹ کسانو ته مرګ ژوبله اوښتې ده

د نورستان ولایت مسولین وایي، نن له غرمې وروسته د دغه ولایت دواب او نورګرام ولسوالۍ پر عمومي لار د سنګ پول سیمه کي یو ډاډسن موټر له سړکه لویدلی چي له امله یې یوه کوچني ژوند له لاسه ورکړی او ۸ کسه ټپیان سوي دي.
د نورستان د والي ویاند وايي، چي پیښه د موټر چلوونکي د بې احتیاطۍ، د سړک د تنګ والي او خرابوالي له امله رامنځته سوې ده .
نوموړی وایي، د پیښي ځای ته پروخت د بیړنۍ مرستي په موخه حکومتي مسولین رسیدلي او په خبره یې چي ټپیان یې د درملني لپاره د ولسوالۍ روغتیایي مرکز ته رسولي چي روغتیایي وضعیت یې د ډاډ وړ ښودل سوی دی.
له دې وړاندي هم د نورستان بیلابیلو سیمو ته د غځیدلو لارو په اوږدو کي ورته ترافیکي پیښي رامنځته سوي او خلکو ته پکښي مرګ ژوبله اوښتې ده.