لومړنۍ چاودنه نن چهارشنبه کوټي ته نژدې په پښین ښار کي د یوه خپلواک نوماند اسفندیار کاکړ او دوهمه هغه په قلعه سیف الله کي د مولانا فضل الرحمان په مشرۍ د جمعیت علما اسلام د ګوند پر ټاکنیز دفتر سوې ده. اسوشېټېډپرېس خبري اژانس د بلوچستان ایالت د چارواکو په حواله ویلي چي لومړنۍ چاودنه کي ۱۴ او دوهمه کي ۱۰ تنه وژل سوي دي. تراوسه د چاودنو مسوولیت کومي ډلي نه دی منلی، خو تر دې مخکي تحریک طالبان پاکستان او بلوڅ بیلتون غوښتونکو د ورته بریدونو پړه منلې ده.
په پاکستان کي سبا پنجشنبه پارلماني یا عمومي ټاکني کیږي او لسګونه زره پولیس او ملېشه ځواکونه ئې امنیت ته ګمارل سوي دي.