چارواکي وایي، د کندهار د ارغنداب ولسوالۍ په ګل کلاچه سیمه کي یوه کس خپله مېرمن وژلې او خپل اخښی یې ټپي کړی دی.
د کندهار د ارغنداب ولسوالۍ مرستیال وایي، دغه پېښه تېره شپه رامنځ ته سوې او قاتل تښتېدلی خو د نیولو هڅي یې رواني دي.
د ارغنداب ولسوالۍ یو تن اوسېدونکی وایي، دغه نجلۍ چي شاوخوا ۱۵ کاله عمر یې درلود، یو نیم کال مخکي واده سوې وه.
د هغه په وینا، د خاوند په کور کي یې ژوند له ستونزو ډک وو او د تاوتریخوالي له امله یې یوازي درې میاشتي هلته تېري کړي وې او بیرته د پلار کور ته تللې وه.
ده وویل، د دې نجلۍ خاوند تېره شپه د خپل خسر کور ته ورغلی نجلۍ يې ویشتلې او وژلې ده او خپل اخښی یې ټپي کړی دی. په کندهار کي له دې وړاندي هم د کورني تاوتریخوالي له امله ورته پېښي رامنځ ته سوي چي پر مهال یې ښځو او سړیو ژوند له لاسه ورکړی.