وروسته له هغه چي جرمني، کاناډا، هالنډ او استرالیا وویل چي له ښځو سره د اسلامي امارت د جنسیتي تبعیض په اړه به د عدالت نړیوالي محکمې ته شکایت وکړي، د حکومت یو ویاند وايي، په افغانستان کي بشري حقونه خوندي دي او له چا سره تبعیضي چلند نه کیږي.
د اسلامي امارت د ویاند مرستیال حمدالله فطرت وایي، د ځینو هیوادونو هغه تورونه بې بنسټه دي چي طالبان په جنسیتي تبعیض او د بشري حقونو په نقض تورنوي.
د فطرت په وینا، یو شمیر هیوادونه د افغانستان پر ضد پروپاګند کوي.
له بلي خوا د بشري حقونو د څار سازمان وايي، د عدالت په نړیواله محکمه کي د طالبانو خلاف د جرمني، کاناډا، استرالیا او هالنډ اقدام ښايي، په افغانستان کي د ښځو او نجونو له حقونو څخه د پراخو سرغړونو لپاره د عدالت پیلامه وي.