د خوړو نړیوال پروګرام ډبلیو ایف پي په افغانستان کي مخ په زیاتیدونکي ډول بې وزلۍ ته په کتني ویلي چي د بې وزلۍ له امله د هرو دریو نجونو څخه یوې یې د لومړنۍ دورې زده کړي نه دي بشپړي کړي.
د خوړو نړیوال پروګرام د یکشنبې په ورځ د ایکس په ټولنیزه شبکه کي په یو راپور کي ویلي، چي د دغه پروګرام له خوا په ښوونځیو کي کوچنیانو ته د ناشتې برابرول په ښوونځیو کي د کوچنیانو حاضرۍ سره مرسته کوي.
د ملګرو ملتونو دغه پروګرام په دې راپور کي په افغانستان کي د بشري پروګرامونو لپاره د بودیجې کمښت ته په اشارې ویلي چي په ۲۰۲۱ کال کي په افغانستان کي واک ته د طالبانو د بیا رسیدلو وروسته په دغه هیواد کي د بودیجې کمبود او اقتصادي بحران افغانانو ته د خوراکي توکو د مرستو برابرولو څخه ترلاسه سوي لاس ته راوړني د خطر سره مخ کړي دي.
د ملګرو ملتونو د خوړو نړیوال پروګرام ویلي چي په افغانستان کي د اقلیم بدلون بحران څخه زیږیدلي ګواښونه او ننګوني په ټول هیواد کي خلکو ته ستونزي را ولاړي کړي دي.