په افغانستان کي د ملګروملتو مرستندوی ماموریت، یوناما وايي، باوري راپورونه یې ترلاسه کړي چي د پکتیکا په برمل ولسوالي کي د پاکستان د هوايي ځواک په برید کي د کوچنیانو او ښځو په ګډون لسګونه ملکیان وژل سوي دي.
یوناما پر خپله ایکسپاڼه لیکلي، نړیوال قوانین پوځي ځواکونه مکلف کړي چي ملکي وکړو ته د زیان نه اوښتو لپاره ضروري احتیاطي تدابیر ونیسي او د جنګي عملیاتو په ترڅ کي د ملکیانو او پوځیانو ترمنځ تفکیک وکړي.
یوناما همداراز ویلي، څېړنو ته اړتیا ده چي د داسي حساب ورکولو ډاډ ترلاسه سي چي د دې ډول پېښو د تکرار مخه ونیول سي او د قربانیانو حقونه خوندي سي.
بل خوا چارواکو ویلي چي د پاکستان په بمبارۍ کي د وژل سویو کسانو شمېر ۵۱ تنه رسېدلی چي اکثره یې کوچنیان او ښځي دي.
د اسلامي امارت دفاع وزارت یاد برید “وحشیانه او د نړیوالو اصولو خلاف” بللی او ویلي یې دي چي بې ځوابه به پاته نه سي.
